Tubtob sa diin ang sarang nga mahimo sang artificial intelligence, pati ayhan sa pagpangdaya sa mga eksaminasyon sa eskwelahan?
Sa South China Agricultural University sa Guangzhou, China, dakop ang isa ka estudyante matapos maggamit sang AI-powered smart glasses agud makapangopya sa isa ka test sang Hulyo 1, 2026.
Santo sa report, halos napulo ka minutos lamang ang nakaligad humalin sang nag-umpisa ang exam sang matalupangdan sang proctor nga nagsiga sang makadali ang antipara sang isa ka estudyante nga ginkilala nga si Lin.
Ginpakakas sa iya ang iya antipara, kag sa ulihi, nag-ako si Lin nga AI-powered smart glasses ang iya ginasuksok.
Base sa report, ang ginasuksok ni Lin amo isa ka “Leqi Smart Glasses” nga ginlunsyar sang Setyembre sang nakaligad nga tuig.
Sarang ini magsolbar sang mga pamangkot paagi sa pagkuha sang litrato kag indi na kinahanglan sang voice commands.
Apisar ginatabunan ni Lin ang LED indicator nga nagasiga kada magkuha ini sang litrato, wala ini nakahibalo nga may green light nga nagasiga sa lente sang antipara nga kitaon sa iban nga anggulo rason kun ngaa nadakpan si Lin.
Matapos naglapta ang insidente sa social media, madamo nga netizens kag estudyante ang nagsiling nga mahimo matago ang green light gamit lamang ang mga sunshade stickers.
Naglapta man online ang mga advertisement sang mga nagapa-renta sang AI-powered glasses sa balor nga 200 yuan ukon kapin P1,800.
May pila man ka mga manugbaligya nga nagahatag sang guide kun paano gamiton ang mga antipara sa silent kag low brightness mode agud indi mahalata.
Nagpaandam naman ang isa ka product manager nga eksperto sa smart glasses, nga sa mga masunod nga tinuig, mas mangin kaangay na sang mga ordinaryo nga antipara ang itsura sang AI-glasses.
Gani lauman nga mas mangin mabudlay para sa mga buluthuan ang pagtumod kun sin-o ang mga nagapangdaya sa mga exam.
