Pilason ang isa ka estudyante matapos maglumpat sa apat ka panalgan nga building sang isa ka buluthuan sa ciudad sang Bacolod, kahapon, Enero 12.
Sa interview sang Bombo Radyo sa Punong Barangay, ginbully ang biktima sang iya nga classmate bangud gina-alegar nga may ginkuha ini nga gamit nga indi iya.
Ini ang ginapahayag rason nga siya ang naglumpat sa apat ka panalgan nga building.
Suno diri, nagkabit-kabit pa ang bata antes nagbuya kag naglumpat.
Gilayon nga gindala sa ospital ang biktima para sa nagkaigo nga pagbulong.
Wala naman sang nakita nga serious injury sa biktima.
Nagapadayon naman ang imbestigasyon sang kapulisan tuhoy sa insidente.
Sa interview sang Bombo Radyo Bacolod kay Police Captain Andro Maapni, officer in charge sang Bacolod Police Station 3, ang biktima ang isa ka grade 11 Senior High School student.
Suno kay Maapni, pagakadtuan nila subong nga adlaw ang balay sang biktima agud matumod ang matuod nga rason kag matul-id ang detalye sa nasambit nga insidente.
Dugang pa sini nga magapatigayon sila sang imbestigasyon sa buluthuan kun sila ang pahanugutan.
Pahayag ni Maapni nga kun may kaangay nga insidente sang bullying, gilayon nga ipahibalo sa kapulisan agud nga marespondehan kag ma-address ang problema kag malikawan ang kaangay nga hitabo.
