Ginsalbar sang traffic ang isa ka estudyante rason nga nakaluwas ini sa posible nga kamatayon sang naghugppaas ang eroplano nga iya kuntani sakyan halin sa India.
Ini ang estorya ni Bhoomi Chauhan, 28-anyos nga business administration student sa Bristol, England nga nagbakasyon sa Western India para sa holiday.
Suno kay Chauhan, naatrasar siya sa pagkadto sa airport bangud naipit siya sa traffic.
Nag-abot siya sa paluparan sa Ahmedabad 10 minutos matapos nga nag-umpisa ang boarding process.
Wala na siya ginpasugtan sang staff nga makakadto sa seat 36G sa Boeing 787 bisan pa nga naka-check-in siya online.
Pila ka ginutlo lang ang nagligad matapos ang take-off, nagtibusok na ang eroplano kag masobra sa 260 ang napatay.
Para kay Chauhan, milagro ini nga hitabo.
Ini kag ang isa ka lone survivor nga British national nga si Vishwashkumar Ramesh amo ang pila sa “miracle stories” sa sini nga plane crash.
Base sa airline company, sakay man sa eroplano kag napatay sa amo nga trahedya ang British, Indian, Portuguese kag Canadian nationals.
Nagapadayon pa ang imbestigasyon sang Indian authorities kun ngaa natabo ang pag-crash.
