Nagapanawagan ang isa ka Senior High School student sa Commission on Elections nga i-organize sang maayo ang proseso sa voter’s registration.
Suno kay Julia del Rosario, alas-11:00 sang gab-i sila nakaabot sa Robinson’s Place Bacolod sa paglaom nga makaparehistro bangod ini ang kalakip sa requirements nila sa signing of clearance agud makagraduate.
Sa pag-abot nila may ginabanta 200 tubtob 300 na nga nakapila.
Suno diri, may pila na kuntani nga tarong sang gab-i apang sang kapin alas-5:00 tubtob alas-6:00 sang aga, nakibot na lamang sila sang nagdinalagan ang mga magaparehistro bangod may naghambal nga sa lain ang entrance.
Samtang nagsulugat-anay naman ang iban nga voter’s registrants bangod sa pihak, lain man ang entrance nga ginsugid.
Ini ang nagresulta sang pagkalipong sang pila ka magaparehistro, kag may-ara man sang nadulaan sang kwarta.
Suno kay del Rosario, wala ma-organize sang maayo ang voter’s registration, kag wala man lang sang ginbutang agud magmanage sang pila.
Dugang pa sini nga kun sala nga entrance ang ginapilahan, kuntani temprano pa ang mga ini gin-abisuhan agud nga gilayon nga nakay-o.
Bangod sila ang nasal-utan na sang mga ulihi naka-abot sang maguba ang ila una nga pila, mapilitan ang mga ini nga magbalik karun agud maseguro nga makaparehistro bwas.
Samtang apisar nga nag-absent sa trabaho, wala man nakaparehistro ang 20 anyos nga residente sang Barangay Villamonte.
Sa interview sang Bombo Radyo Bacolod kay Arclyde Villacojer, alas-9:00 sang gab-i pa lamang sila sang napadulong sa mall.
Nakasulod na ini kuntani kaina apang siya ang wala ginbatun bangod Company ID lamang ang iya nahuptan.
Suno kay Villacojer, may printed copy ini sang National ID apang wala pa gihapon nakaabot ang mismo nga ID.
Pahayag sa iya sang Comelec nga valid ID ang ginabatun, apang siya ang wala na sang iban pa nga ID.
