Gilayon nga ginhanda kag ginrevisit sang La Carlota city government ang ila nga evacuation kag emergency plans kasunod sang serye sang linog sa west lower flanks sang Kanlaon Volcano sa Negros Island sang nagligad nga adlaw.
Sa interview sang Bombo Radyo Bacolod kay La Carlota City Mayor Rex Jalando-on, ginpahayag sini nga naka-hightened alert na ang ila nga ciudad sa karon matapos ginpaidalom sa Alert Level 1 ang bulkan.
Ginkumpirmar man sang alkalde nga nagsapol sa ila kahapon si Provincial Disaster Management Program Division head Dr. Zeaphard Gerhart Caelian upod ang City Disaser Risk Reduction and Management Council sang ciudad subong man sang mga Punong Barangay.
Suno diri, lima tanan ka mga barangay ang apektado ukon malapit sa tiilan sang Bulkan Kanlaon.
Ini ang ginalakipan sang Barangay La Granja, San Miguel, Haguimit, Ara-al kag Yubo.
Ginaproblemahan karon sang ciudad amo nga ang mga evacuation centers ang ginagamit sang mga locally-stranded individuals (LSIs).
Ila ginaplano nga pananglitan kinahanglan sang force evacuation, ang mga eskwelahan na lang anay kag ang mga covered courts ang gamiton.
Samtang, ginkabalak-an man nila kahapon amo ang paglubog sang tubig nga ginasuplay sang ila water district kun sa diin ang water source ang nagikan sa isa ka spring sa Barangay Haguimit nga malapit sa bulkan.
Gilayon naman nga nagpatigayon sang flushing ang water district agud nga matinluan ang tubig.
Samtang, nagalaom naman ang provincial government nga minor volcanic activities lang ang nagakatabo sa Bulkan Kanlaon.
Suno kay Provincial Administrator Atty. Rayfrando Diaz, nagapangabay si Governor Eugenio Jose “Bong” Lacson sa tanan nga magpangamuyo gid agud indi na ini mangin panibag-o nga kalamidad.
Suno kay Diaz, may yara pa karon sang COVID-19 pandemic nga ginapangatubang ang tanan.
