Dako nga palaligban para sa alkalde sang La Castellana, Negros Occidental ang pagpanghakot sang linibo nga evacuees pananglitan nga magasaka sa Alert Level 4 ang Bulkan Kanlaon.
Suno kay La Castellana Mayor Rhumayla Nicor Mangilimutan, ang problema kun magtaas ang Alert Level sang Bulkan ang ginapaminsar sang mga ini ang mobility kag kun sa diin sang mga ini pagadal-on ang mga evacuees.
Suno kay Mangilimutan, sa banwa sang La Castellana kun magsa sa Alert Level 4 ang nasambit nga bulkan ang kinahanglan i-evacuate ang magadangat sa 37,000 ka mga residente.
Ginpahayag sang alkalde nga nagapanumdom ini sang transportation kag mga evacuation centers nga padulungan.
Suno diri, ginalantaw nga magcoordinate ang mga ini sa Vallacar Transit kag mga magagmay nga bus owners sa ila nga banwa.
Apang ginpahayag man sang alkalde nga mas nagatutok ini sa pagpangita sang permanente nga solusyon sa ila ginapangatubang nga pagpanghangkat sa karun.
Suno kay Mangilimutan ang ila contingency plan ang reviewhon pa agud nga maplastar ang transportation kag evacuation centers ng pagadal-an sa mga magaevacuate.
Madamo man sang lugar nga dapat dal-an sang mga ini bangud ang 37,000 ang indi makaigo sa tent city sa ciudad sang Himamaylan.
Pila sa mga lugar ang ginalantaw amo ang Panaad sa ciudad sang Bacolod, ciudad sang Talisay kasubong man ciudad sang Silay.
Natalana man ang alkalde sang La Castellana nga magahinun-anon sa Office of Civil Defense angot diri.
