Nagbata sa evacuation center sa banwa sang Moises Padilla ang isa sa mga evacuees alas-4:00 kaina sang kaagahon.
Ang iloy nga si April Joy Mones, 32 anyos, residente sang Sitio Sulbod, Barangay Crossing Magallon, ang nagbun-ag sang isa ka baby girl.
Sa interview sang Bombo Radyo Bacolod kay Moises Padilla Municipal Social Welfare and Development Office (MSWDO) Head Kersey Sumadhay, nag-evacuate si Mones upod sa iya pamilya kapin alas-7:00 tubtob alas-8:00 kahapon sang aga bilang pagpangaman bangod ang ila balay ang malapit sa sapa.
Sa pag-abot pa lamang sini sa evacuation site, natalupangdan na sang MSWDO nga kaangay nga manugbata na si Mones.
Kaina alas-4:00 sang aga, natigayon nga nagbun-ag sang baby girl si Mones sa bulig sang iban nga evacuees.
Gilayon man nga nagtawag ang on-duty nga Barangay Peacekeeping Action Team (BPAT) sa Municipal Disaster Risk Reduction ang Management Office, apang nakagwa na ang bata sa pag-abot sang rescue team.
Ang iloy kag ang lapsag ang gilayon naman nga gindala sa Municipal Health Center agud mahatagan sang nagakaigo nga pagtatap.
Dako man ang kalipay sang amay bangod 10 ka tuig man antes nasundan ang duha nila ka bata nga lalaki.
Suno kay Sumadhay, health ang baby girl kag sa impormasyon gikan sa personnel sang MDRRMO, ang mag-iloy ang nakapauli na sa ila puluy-an.
