c ang 23 ka pamilya nga mga pumuluyo sang Purok Balatong, Barangay Ilijan, Bago City nga nag-evacuate sang magluntad ang linog sa siyudad sang Bago sang Lunes, Hunyo 22.
Nahibaluan nga may dalagko nga mga bato sa naibabaw nga bahin sang bukid malapit sa mga pamalay.
Suno kay Dr. Merijne Ortizo, head sang Bago City Disaster Risk Reduction and Management Office (CDRRMO), nahangawa ang mga pumuluyo nga kun liwat nga maglinog tuga sang bulkang kanlaon, posible nga madagdag ang nasambit nga bato kag magligid sa mga pamalay.
Magluwas sa nagluntad nga linog sang Lunes, dugang man sa ginakabalak-an sang mga pumuluyo ang pagsungaw sang asupre ukon aso nagikan sa bulkan.
Gincheck naman kahapon sang CDRRMO ang area kag ginklaro nga malayo ang posibilidad nga mahulog ang dalagko nga bato sa mga panimalay.
Ginklaro naman ni Ortizo nga may preparasyon na ang siyudad kag nagpadala ini sang team nga magapatigayon sang information dissemination sa mga lugar nga apektado kalakip na ang Barangay Mailum kag Barangay Ilijan.
Positibo naman sini nga ginalantaw ang nangin tikang sang mga pumuluyo bangod nagapakita ini nga nakahanda sa kalamidad ang mga residente sa lugar.
