Nagdangat sa 110 ka pamilya ukon 368 ka mga indibidwal sa ciudad sang Silay ang nag-evacuate padulong sa Civic Center bangud sa pagbaha tuga sang madamol nga pag-ulan halin kagab-i.
Sa interview sang Bombo Radyo Bacolod kay Silay City Mayor Mark Golez, ginpahayag sini nga wala gid sila nakapanghanda sa pagbaha bangud wala man sang forecast nga may yara sang makusog nga pag-ulan.
Suno kay Golez, padayon pa ang evacuation karon nga ginapatigayon sa iban nga mga barangay.
Paathag sang alkalde nga bangud sa makusog nga bubo sang ulan sa bukid kag ginsugata sang high tide, rason kun ngaa nagsaka ang tubig sa amo nga ciudad.
Sa karon ginapreparar na sang city government ang mga foodpacks nga inugpanagtag sa mga apektado nga mga persona.
Maga-convene naman ang Silay City Disaster Risk Reduction and Management Council agud maplastar ang sitwasyon sa ciudad.
Nagpanugyan man si Golez sa mga pumuluyo nga magpakig-angot sa mga otoridad kag indi magkabalaka bangud gina-obra sang ciudad ang tanan.
Ginpasiguro naman sang Department of Social Welfare and Development (DSWD) Silay City nga nagasunod sa gihapon sa health protocol ang mga yara sa civic center.
Suno kay Rose Taguenera, pinuno sang DSWD sa amo nga ciudad, ila gintipon by household ang mga evacuees.
