Ex-DPWH Sec. Manuel Bonoan, nagpasalig sang “tell-all” nga pagpanugid angot sa systema sang kurapsyon kabaylo sang paghimo sa iya nga state witness

Naghingyo si anay Department of Public Works and Highways (DPWH) Secretary Manuel Bonoan sa Office of the Ombudsman nga himuon siya nga state witness angot sa ginapatigayon nga imbestigasyon sa ginaalegar mga anomaliya sa flood control projects sang gobyerno.

Nagpasalig ini nga magahatag sang “tell-all” nga panalaysayon natuhoy sa sistema sang korapsyon.

Sa karon, nagapangatubang si Bonoan sang mga kaso nga plunder kag graft sa Sandiganbayan may kaangtanan sa ginaalegar P573 million nga kickback scheme nga gina-angot man kay Sen. Jinggoy Estrada.

Sa mosyon nga ginpirmahan sang Hunyo 29, ginpahanugutan sang Ombudsman ang pangabay ni Bonoan bangud sa iya nga direct knowledge bilang anay tiglikom sang DPWH sa mga isyu natuhoy sa flood control scandal.

Ginpahayag man nga isa sa mga rason sang iya pagkooperar amo ang katigulangon kag nagalala nga ikaayong lawas.

Bangud sa ginalauman nga sensitibo nga testimonya ni Bonoan, naghingyo man ang Ombudsman sa Department of Justice nga himuon ang nagakaigo nga tikang agud masiguro ang iya seguridad kag proteksyon.

Ginsaylo man ang arraignment ni Bonoan sa Hulyo 14 kag 28 depende sa division nga maga-uyat sang mga kaso.