Dakop ang gina-alegar ex-marine matapos magpamahog sa tag-iya sang gina-estaran nga boarding house sa Villa Servando Subdivision, Barangay Singcang-Airport, Bacolod City kapin alas-9:00 kagab-i.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 8, nagdangop sa ila si Japeth Adrian Segador, 28 anyos, delivery rider agud ireklamo ang dismissed Philippine Marines nga ginkilala nga si Herald Jones Hilado, 28 anyos bangod sa pagpamahog gamit ang armas-luthang.
Si Hilado ang tumandok sang Barangay 3, Burgos Street sa ciudad sang La Carlota, apang temporaryo nga nagboard sa balay pinaagi sa magulang ni Segador.
Suno kay Tolentino, ginaverify pa nila kun diin nga unit sang Philippine Marines sadto si Hilado, apang sa inisyal nga kumpirmasyon gikan diri, kag sa iya nga live-in partner siya ang gina-alegar nag Absent Without Official Leave (AWOL) gani nadismiss sa serbisyo
Pahayag sang biktima nga luyag na nila kuntani pahalinon sa ila balay ang ex-marine bangod ini ang masami nga nagapagwa sang armas-luthang kag ginalampos pa sa lamesa kun maakig.
Ini ang nagahatag man sang kahangawa sa ila ilabi na nga sila ang may mga kabataan nga kaupod sa balay.
Suno kay Tolentino sang ila pahalinon sa balay si Hilado, ini ang nangakig kag nagpagwa sang cal. 45 pistol nga loaded sang bala.
Sang magresponder ang kapulisan, naaktuhan mismo nga yara sa kamot ni Hilado ang armas-luthang gani ini ang gilayon nga gin-aresto.
Kaina sang udto, napaidalom na sa inquest proceedings sa Bacolod City Prosecutor’s Office si Hilado, nga mangatubang sang kaso nga grave threat kag RA 10591 ukon Compresehensive Fire Arms and Ammunition Regulation Act.
