Aminado ang Executive Director sa Bacolod Emergency Operation Center (EOC) nga amat-amat na nila nga nagakakita posibilidad nga kulangon ang supply sang medical grade oxygen sa syudad.
Suno kay Bacolod City Administrator Em Ang, ang shortage sa oxygen ang indi lang ini problema sang syudad sang Bacolod kundi problema sang bilog nga Pungsod.
Bangod sini, gilayon naman nga nagpatawag sang meeting ang Department of Health (DOH) sa mga local chief executives sang nanari-sari nga local government units (LGUs) agud diskusyunan kag masulosyunan ang problema.
Nahibaluan nga kun matapikan sang COVID-19 ang isa ka indibidwal, ang una sini nga gina-atake amo ang baga, nga amo ang nagaproduce kag nagadul-ong sang oxygen sa nanarisari nga bahin sang organs sa lawas.
Kun sa diin, ang isa sa una nga sintomas nga ginabatyag sang mga nagalala na ang COVID-19 infection amo ang kabudlayan sa pagginhawa.
Bangod sa nagataas nga kaso, nakita na sang EOC ang shortage sa medical grade oxygen sa mga ospital nga amo man ang gina-address sang DOH.
Suno kay Ang, may tatlo ka oxygen generating plant ang syudad nga amo ang nagasupply sang mga medical grade oxygen sa mga ospital kag may planta man ang probinsya.
Pasalig naman sini nga supesyente ang supply sa syudad kun ang pagabasehan ang planta, apang sa karun ang ginakulang amo ang liquid oxygen.
Ang liquid oxygen ang isa sa mga mayor nga component sa paghuman sang medical grade oxygen.
Paathag sini nga ang liquid oxygen nga gamit sang mga planta sa syudad ang gikan pa sa planta sa Cebu nga nagamanufacture sang liquid oxygen nga ginakulang sa karun bangod sa tuman ka damo sang nagakinahanglan.
Dugang pa sang City Administrator nga naguba ang planta sang liquid oxygen sa Mindanao gani sa Cebu naman nagakuha sang supply ang mga planta sang medical grade oxygen sa lugar.
Bangod sa naganubo nga supply kag pagtaas sang demand, ginakahangaw-an sang mga ini nga magataas ang presyo sang medical grade oxygen.
Panawagan naman sang opisyal sa mga manufacturer kag retailer nga kun mahimo, indi lang ang mga ini magpasaka sang presyo.
Dugang pa sini nga dako man ang posibilidad nga ang iban ang ma-hoard.
Santo pa sa ospiyal sang planta nga nakasugilanon ni Ang, ang sang una nga ginabakal sang ospital nga 20 ka tangke sang oxygen, ang karun 50 na ka tangke ang ginabakal.
Bangod sini, ginatunga-tunga nalang sang planta ang pagbaligya agud makaambit ang tanan.
