Nagapati ang executive director sang Emergency Operation Center (EOC) sa ciudad sang Bacolod nga makabulig gihapon ang pagsuksok sang faceshield bilang ikaduha nga layer sang proteksyon.
Suno kay Bacolod City Administrator Em Ang, nagapadayon gihapon ang pagsaka sang kaso sang COVID-19 sa syudad sang Bacolod.
Pahayag ni Ang, nga nagapati ini nga mapuslanon ang faceshield ilabi na sa mga matawo nga lugar, kasubong man sa mga enclosed kag wala sang maayo nga ventilation.
Suno kay Ang, mas maayo na nga maghalong kag maggamit sang dugang nga proteksyon ilabi na nga gamay palang nga porsyento sang populasyon ang nabakunahan sang COVID-19 vaccine.
Nagapati ang City Administrator nga ini na ang pinaka cost-less nga pamaagi sa paglikaw sa paglatun sang virus.
Kumporme naman ini nga sarang na nga maghukas sang facemask kun yara sa mga lugar nga indi matawo, ukon nagalakat nga naga-isahanon.
Paathag sini nga personal nya lang ini nga panulok kag bisan ang mga eksperto ang tunga man ang pagtan-aw natuhoy sa isyu.
Ginpakigbahin man sini nga argumento sang iban nga wala na nagagamit sang faceshield ang iban nga pungsod gani dapat magsunod naman ang Pilipinas.
Paathag ni Ang nga ginpanubuan na sang iban nga mga pungsod ang ila restriksyon kalakip na dira ang paglift sa ordinansa nga pagsuksok sang faceshield bangod nabakunahan na ang mayorya sang ila populasyon.
Kun basihan naman ang porsyento sang nabakunahan sa Pilipinas, nagapati si Ang nga indi pa nagakaigo ang tion nga magpanubo sang restriksyon.
Samtang, pahanumdom man sini nga nagasegi sa pagbantay ang Task Force Disiplina kag Philippine National Police (PNP) sa paghatag sang penalidad sa mga nagakadakpan sa bayolasyon, bangod may ginasunod ang mga ini nga ordinansa.
