Nagapati ang executive officer sang 79th Infantry Battalion sang Philippine Army nga may yara sang rason kun ngaa nakasalbar siya sa madamo nga pilas sang ila nga naengkwentro ang Abu Sayyaf terrorists sa Zamboanga Sibugay sang tuig 2020.
Si Major Jestoni Labarosa ang walo ka tuig nga naassign sa Mindanao humalin sang nakasulod siya sa military service, 15 ka tuig ang nakaligad.
Sang ila nga naengkwentro ang Abu Sayyaf sa sulod sang tatlo ka oras sang tuig 2020, napilasan si Labarosa sa butkon kag tuhod apang ginpasulabi niya nga matapos sang ila unit ang mission antes siya nagpa-evacuate sa pinakamalapit nga ospital.
Sa interview sang Bombo Radyo kay Labarosa, diutayan lang siya napatay sang amo nga tion apang nagapati siya nga may purpose ang iya kabuhi gani siya ang nakasalbar.
Nangin mabudlay ang komunikasyon sang amo nga tion bangud sa COVID pandemic apang nagpasalamat ini sa iya pamilya kag sa tanan nga nagsuporta sa iya.
Indi malipatan ni Labarosa ang amo nga eksperyensya.
Suno sa teacher-soldier, indi malikawan sa ila nga trabaho ang pagluntad sang engkwentro apang handa sila para diri.
Apang nalipay ini sa tion nga iya mabatian nga nag-umwad ang lugar bisan wala na siya subong nadestino sa Mindanao. Samtang, ginakabig sang executive officer sang 79th Infantry Battalion nga pinakadako nga accomplishment sa iya kabuhi ang makapauli halin sa engkwentro sa mga terorista nga wala sang napatay nga miyembro sang tropa.
Sa interview sang Bombo Radyo kay Major Jestoni Labarosa, wala sang kaupod niya sa unit nga napatay matapos ang inaway sa sulod sang 15 ka tuig niya sa serbisyo.
Suno kay Labarosa, dako nga accomplishment para sa iya nga makapauli ang suldado nga buhi sa iya pamilya.
Nagapati ang teacher-soldier nga motivated ang mga suldado nga maghimo sang ila trabaho kun mataas ang ila morale gani kinahanglan gid ang communication sang unit commander sa iya mga kaupod agud magpabilin sila nga united.
Si Labarosa ang recipient sang Distinguished Conduct Star, ikaduha sa pinakamataas nga award para sa isa ka suldado sang Pilipinas.
Ini ang ginhatag mismo ni President Bongbong Marcos sang tuig 2025 kadungan sang founding anniversary sang Philippine Army.
Suno sa iya, nabaton niya ang award bangud sa pagbuligay sang bilog nila nga unit sang assigned pa ini sa Mindanao kun sa diin indi basta-basta ang ila kabudlay kag paghimakas agud mapapas ang mga terorista.
