Ginpirmahan na ni Bacolod City Mayor Evelio “Bing” Leonardia ang executive order angot sa pagpalawig sang enhanced community quarantine sa ciudad tubtob sa Mayo 15.
Sa video press conference nga ginpatigayon, ginpahayag ni Leonardia nga nagapasalamat siya sa madasig nga response sang Sangguniang Panlungsod kag ni Vice Mayor El Cid Familiaran agud makadihon gilayon sang EO.
Madumduman nga nalakip ang Bacolod sa mga local government units (LGUs) nga yara sa low ukon moderate risk kag pwede na maka-downgrade sa general community quarantine santo sa rekomendasyon sang national inter-agency task force (IATF).
Apang naghingyo ang ciudad sa IATF nga palawigon tubtob Mayo 15 ang ECQ bangud sa madamo nga kaso sang COVID-19 kag sa mga pending test results pa.
Kahapon, ginkumpirmar ni Presidential Spokesperson Harry Roque nga aprubado sang IATF kag ni Presidente Rodrigo Duterte ang apelasyon sang ciudad.
Santo sa EO No. 34, magasugod ang pagpalawig sang ECQ alas-11:59 kagab-i, Abri 30 tubob alas-11:59 sang gab-i sa Mayo 15.
Magatukod man sang oversight committee nga may yara sang lima ka mga miyembro agud magtuon sa trend kag updates sa tion sang ECQ kag maga-rekomendar sa alkalde sa kun ano ang dapat nga tikang nga pagahimuon.
