Wala pa napirmahan ni Governor Eugenio Jose “Bong” Lacson ang executive order para sa implementasyon sang General Community Quarantine sa probinsya sumugod bwas, Mayo 1.
Suno kay Lacson, luyag niya man kuntani nga pirmahan ini kahapon, apang wala pa nakapagwa sang final resolution ang national inter-agency task force (IATF) angot diri.
Paathag sang gobernador, gina-istoryahan pa tubtob subong ang isyu angot sa mass transportation sa probinsya.
Dugang pa sini, indi maka-issue sang EO ang gobernador kun wala sang guidelines nagikan sa Department of Transportation (DOTr).
Madumduman nga nalakip ang Negros Occidental sa mga probinsya nga low risk sa COVID-19 kag ginrekomendar sang IATF nga magpaidalom na sa GCQ.
Nahibaluan nga ang ECQ nga ginapatuman sa karon ang magatapos subong nga adlaw.
