Ginpirmahan kahapon ni Negros Occidental Governor Eugenio Jose “Bong” Lacson ang Executive Order No. 20-26 series of 2020 nga nagapalawig sa ginapatuman nga modified general community quarantine sa probinsya tubtob Hunyo 30.
Sa interview sang Bombo Radyo Bacolod kay Provincial Administrator Atty. Rayfrando Diaz, ginpahayag sini nga ang tanan nga probisyon nga yara sa EO 20-25 ang ginpalawig lamang apang may yara sang gindugang nga mga guidelines.
Suno diri, ang mga locally stranded individuals nagikan sa Cebu ang dapat lamang mag-agi sa Escalante Port kag ipaidalom sa mandatory 14-day quarantine sa isolation facility sa ciudad sang Cadiz kag ipaidalom sa swab testing.
Samtang, ang mga LSIs naman nagikan sa Metro Manila ang kinahanglan mag-agi sa thermal scanners sa airport kag seaports kag ipaidalom man sa swab testing.
Dapat man nga sugaton ang mga ini sang ila tagsa ka mga local government unit agud idiretso sa ila quarantine center ukon sa ila mismo balay para mag-home quarantine tubtob nga maggwa ang test result sini.
Kag ang mga LSIs naman nagikan sa Iloilo ang dapat man mag-agi sa thermal scanners kag magpasa sa ila swab sample para sa RT-PCR testing.
Sugaton man ang mga ini sang ila tagsa ka LGU agud nga idul-ong sa ila tagsa ka mga balay para magpaidalom sa istrikto nga home quarantine tubtob nga maggwa ang resulta sang swab test.
Suno kay Diaz, kinahanglan gid nga I-swab test ang mga nagikan sa Iloilo agud nga makatukod sang bastante nga numero sang mga samples nga magapamatuod nga ang nagatabok nagikan sa Panay island ang indi infected sang COVID.
Suno diri, posible nga maglawig lamang ang swab testing sa mga nagikan sa Iloilo tubtob sa Hunyo 30.
Kun mapamatud-an nga wala sang may nagapositibo sa mga ini, posible nga dulaon na ini nga protocol pagkasunod nga bulan.
