Ginakalipay sang Alliance of Concerned Teachers ang pagmensyonar ni President Ferdinand ‘Bongbong’ Marcos Jr. sa State of the Nation Address (SONA) sang expanded career progression system para sa public-school teachers.
Sa interview sang Bombo Radyo Bacolod kay House Minority Leader kag ACT Partylist Representative France Castro, madamo sang mga manunudlo nga pila na ka tuig sa serbisyo apang wala gid mahatagan sang nagakaigo nga promotion.
Ginalauman sini nga maaprubahan ang plano nga nagahulag na sa Senado kag gina-umpisahan naman sa pagtuon sa House of Representative.
Pinaagi sini mareevaluate ang mga manunudlo kag mahimo mahatagan sang promotion.
Positibo man para sa ACT Partylist ang pahayag ni Presidente Marcos nga salary increase sa mga empleyado sang gobyerno, kalakip na ang mga manunudlo kun sa diin ini ang ihatag sa apat ka tranches.
Ang balantayan na lamang ang kun pila ang ipasaka sa sweldo, kun sa diin nagakahangawa si Castro nga tuman ka gamay ang ihatag.
Panawagan sang mga ini nga mapasaka sa P50,000 ang sweldo sang Teacher 1 kag at least P33,000 sa mga non-teaching personnel.
Hingyo sini nga kun indi man malab-ot ang nasambitan nga kantidad, ang ihatag nga saka sa sweldo ang malapit-lapit sa ila ginapangayo.
Bangod ang salary increase ang namensyonar sa SONA, nagapati si Castro nga mangin urgent man ini sa 3rd regular session sang Kongreso.
Panawagan man nila nga mauntat na ang paggamit sang mga loan shark sa Professional Regulation Commission (PRC), kun sa diin indi marenew ang wala makabayad sa ila.
Panindugan ni Castro nga private transaction ang loans sa isa ka private agency gani indi na dapat maangot pa sa PRC.
