Gin-aresto sa Prague, Czech Republic ang pugante nga si anay Ako Bicol Representative Zaldy Co nga gina-alegar masulod kuntani sa nasambit nga pungsod nga wala sang nagakaigo nga dokumento, suno kay President Ferdinand Marcos Jr. kahapon, Abril 16.
Sa karon, yara na sa kustodiya sang Czech Authorities si Co samtang nagapakig-angot sa gobyerno sang Pilipinas agud ipatigayunon ang mga legal nga tikang para sa iya madasig nga pagbalik sa Pilipinas.
Si Co ang mangatubang sang pila ka criminal case may kaangtanan sa gina-alegar korapsyon sa national budget, partikular sa mga proyekto nga pang-imprastraktura.
Ini ang may kaangtanan man sa isa ka kumpaniya nga nakakuha sang bilyon-bilyon ka pesos nga kontrata gikan sa gobyerno, lakip ang isa ka flood control project nga nagabalor sang P289 million sa Naujan, Oriental Mindoro nga ginapatihan substandard.
Madumduman nga nagapanago si Co humalin pa sang Hulyo 2025 matapos nabuyagyag ang ginaalegar anomaliya sa paggasto sang pondo sang gobyerno.
Sang ulihi nag-resign ini sa iya pwesto sa Kongreso matapos nga wala nakasabat sa mga panawagan nga magbalik sa pungsod.
Sa karon, wala pa sang eksakto nga petsa nga ginhatag para sa extradition ni Co samtang nagapadayon ang legal nga proseso para sa iya nga pagpauli sa pungsod.
