Suguran na sa Enero 2024 ang experimental implementation sang lima ka mga panibag-o nga transport route sa ciudad sang Bacolod.
Ang lima ka routa ang dalaganan sang mga modernized jeepneys nga ginalakipan sang Fortune Town – Central Market, Alijis – Central Market, Eroreco – Central Market, Shopping – Libertad kag Homesite – Central Market.
Ang mga salakyan ang magalabay sa Ayala Malls Capitol Central nga magahatag man sang pickup areas para sa mga pasahero.
Sa interview sang Bombo Radyo Bacolod kay Bacolod City Councilor Al Victor Espino, chairperson sa committee on transportation sa Sangguniang Panlungsod, Desyembre kuntani maga-umpisa ang experimental routes, apang sa pagkonsulta sini sa Land Transportation Franchising and Regulatory Board (LTFRB) nadesisyunan nga sa tunga-tunga sang Enero nalang umpisahan ang programa.
Apang paathag ni Espino nga sa tion nga may extension sa routa, ini ang may katumbas man nga konsekwensya.
Suno diri, nakabutang sa Local Public Transport Route Plan (LPTRP) sa extension sang routa naga-ayo ang mga operator sang modernized jeepneys sang pagpasaka sang plete.
Nakasugtan nga ang regular fare sa modernized jeepneys ang yara sa P14 sa kada apat ka kilometros, samtang ang kada adisyunal nga kilometro naman ang may dugang nga P4.
Sa karun ini pa ang ginapaligban ni Espino bangod suno diri ang interes sang commuters ang iya nga ginalantaw, kag indi interes sang operators ukon pribado nga negosyo.
Ginpropose naman sini ang pagbutang sang terminal sa mall apang ini ang magakinahanglan pa sang approval sang Sangguniang Panlungsod.
Sa pihak nga bahin, apisar sa drop off points, ginpanindugan ni Espino nga sila ang magamonitor man agud nga indi maabusaran sang mga driver kag maglawig sa paghulat sang mga pasahero.
Paathag sang konsehal nga dapat tayuyon ang dalagan sang mga modernized jeepneys kag indi himuon nga kaangay na sang terminal ang mga drop off points.
