Nadugay sa kapin isa ka oras ang explosive eruption sa bulkan Kanlaon kaina sang aga.
Sa interview sang Bombo Radyo kay Pearly Sianson, science research specialist sa Philippine Institute of Volcanology and Seismology (Phivolcs) Kanlaon Volcano Observatory sa La Carlota City, nag-umpisa ang eruption alas- 5:51 sang aga nga nagdugay tubtob alas- 6:47 sang aga.
Suno diri, may gray nga plume nga nakit-an nga nagdangat sa 4,000 meters ang kataason sa dereksyon nga southwest.
Samtang, wala man sang may nareport nga may nabatian nga paglupok ukon may nabatyagan nga paglinog.
Ginalauman nga maapektohan sang ashfall ang banwa sang La Castellana, kag ciudad sang La Carlota kag Bago, samtang bisan sa laboraty sang PHIVOLCS sa La Carlota City ang nakaeksperyensya man sang ashfall.
Abiso ni Sianson sa publiko nga mangin alerto kag likawan ang outdoor activities kag magsuksuk sang mask kun maggwa sa balay.
