Wala na ginpahanugutan ni Bacolod City Mayor Alfredo Benitez ang extension sa pagsaylo sang tenants sang Manokan country sa temporaryo nila nga pwesto.
Suno kay Bacolod City Councilor Celia Flor, chairperson sang Committee on Market sa Sangguniang Panlungsod, dapat makasaylo na subong nga semana ang mga tenants bangod una na nga nasturyahan nga patigayunon ang pagsaylo nila subong nga adlaw, Enero 28.
Suno diri, ginapahanugotan ang amat-amat nila nga pagsaylo sa terminal hub sang SM nga amo ang temporaryo nila nga stall tubtob matapos ang pagconstruct sang Manokan country.
Samtang nagpalab-ot man ang mga tenants sang ila concerns kaangay na lang sang roll up door para sa security sang ila mga gamit kag kun diin iplastar ang mga costumers.
Suno sa konsehal, nagpasalig naman ang mall nga may yara sila sang security guard kag hatagan man sang tion ang mga tenants nga magset up sang ila tents kag mahimo man magpatigayon sang closure sa sulod sang 90 ka adlaw.
Plano man sang ciudad nga maghatag sang food vouchers agud ma-encourage ang mga pumuluyo nga amat-amat nga magpadulong sa temporary stalls samtang may ihatag pa gid nga maximum nga P20,000 financial assistance sa mga tenant’s para matigayon nga mabutangan sang roll up door ang ila stalls.
