Gin-inagurahan na kaina ang extension sang COVID-19 Isolation Facility sang provincial government nga nahamtang sa sulod mismo sang compound sang Cadiz District Hospital sa Hacienda Hortencia, Barangay Daga, Cadiz City.
Mismo si Negros Occidental Governor Eugenio Jose Lacson ang nagpanguna sa blessing kag inauguration ceremony kaupod ang iban nga opisyales sang Kapitolyo.
Ang isolation facility ang may kapasidad nga 100 beds kag gindevelop sa balor nga P32 milyones.
Ini ang dugang sa existing nga isolation facility sang Cadiz District Hospital nga may kapasidad nga 93 beds.
Bangud sini, 193 beds na ang kabug-usan nga kapasidad sang Cadiz District Hospital para sa COVID patients.
Suno kay Lacson, 124 ka COVID patients ang yara sa karon sa nasambit nga balay-bululngan.
Pananglitan magsobra na ang numero sang pasyente sa kapasidad sang isolation facility, pagabuksan naman ang Governor Valeriano Memorial District Hospital sa ciudad sang Himamaylan kag Valladolid District Hospital.
Kun matapos na ang COVID suno kay Lacson, ang nasambit nga building ang gamiton para sa mga pasyente nga may iban nga balatian.
