16 ka mga eskwelahan ang nadugang sa mga ginpahanugutan sa pagpatuman sang expanded face-to-face classes sa Department of Education (DepEd) Division of Negros Occidental.
Suno kay Ian Arnold Arnaez, public information officer sang DepEd Division of Negros Occidental, sa 16 ka mga buluthuan nga nalakip sa expanded face-to-face classes, iban diri ang naka-umpisa na sang Pebrero 17, may-ara man nga kahapon Pebrero 22 kag ginpaabot man nga ang nabilin ang maga-umpisa naman sa Pebrero 28.
Paathag ni Arnaez nga ang syudad sang Talisay nalang ang nabilin nga syudad nga yara sa idalum sang DepEd Division of Negros Occidental bangod ang kada syudad ang may-ara na sang kaugalingon nga DepEd Division Office.
Samtang suno sa PIO nga expanded na sa karun ang face-to-face classes kag indi na limited.
Pahanumdom ni Arnaez nga sa limited face to face classes ang nag-umpisa sang Desyembre kag ang mga ini ang ginakonsiderar nga pilot schools para sa implementasyon.
Nahibaluan nga ang limited face to face classes ang limitado lang sa kinder tubtob grade 3 students kasubong man sa mga senior highscool students nga may laboratory subjects.
Kun sa diin duha lang ka buluthuan ang nakabahin sa pilot implementation sa bahin sang DepEd division of Negros Occidental nga ginlakipan sang Aguntilang Elementary School sa banwa sang Isabela kag ang Valladolid National Highschool.
Suno kay Arnaez ang 16 ka mga dugang nga buluthuan ang nagsumiter sa DepEd para sa assessment kun sa diin ang mga ini ang na-aprubahan man gilayon sa Regional kag Central Office sang DepEd.
Paathag sini nga sa expanded face-to-face classes, makabahin na diri ang halin sa kinder tubtob sa Grade 6 students sa elementarya.
Samtang ang junior highschool nga Grade 7 tubtob Grade 10 ang makabahin naman sa implementasyon indi kaangay sa limited face-to-face classes nga Senior Highschool lang ang ginapahanugutan.
