Naghingyo ang bise alkalde sang ciudad sang Bacolod sa mga punong barangay sang 61 ka mga barangay nga irekord ang mga baboy nga yara sa ila nasakupan agud nga kun ipa-culling ukon ipapatay ini sang gobyerno, may yara sila sang makuha nga bulig pinansyal.
Sa interview sang Bombo Radyo kay Vice Mayor El Cid Familiaran, ASF free na ang Barangay Taculing bangod nga wala naman sang iban pa nga baboy nga nakita sa palibot nga 500 meters nagikan sa ground zero, samtang padayon naman ang monitoring sa Barangay Tangub.
Suno diri, may yara sang mga area nag may nagapalangluya nga mga baboy, gani pahanumdom sini sa mga hog raisers nga kabigon na lang nga ASF ang balatian sang baboy agud maghalong ang mga tawo sa paggwa-sulod sa mga babuyan.
Ginlauman man sini nga mangin para-veterinary workers sa tagsa ka mga barangay ang mga punong barangay nga nag-upod sa seminar sang Hunyo 2 kag sila ang magalibot sa mga purok sang ila area agud mag edukar sa mga backyard hog raisers.
Pahayag ni Familiaran, kun may mga baboy nga ginasuspetsuhan nga may ASF kag ini ginpapatay sang gobyerno, may yara sang assistance nga mabaton ang tag-iya sang baboy.
P3,000 sa kada idik, P5,000 sa kada fattening kag P7,000 sa nayon.
Gani dapat nga libuton ang sulod sang kada barangay kag irekord ang mga nagasagod sang baboy agud nga kun sila ginmanduan nga patyon ang ila baboy, may yara sila sang makuha nga bulig pinansyal.
Ini ang applicable sa mga residente sang Bacolod City kag pahanumdom ni Familiaran, indi pwede nga dal-on ang mga baboy nagikan sa iban nga ciudad agud makakuha sang cash assistance.
