Paagi sa Bombo Radyo Bacolod kag Bombo Radyo Roxas nabuligan ang 25 anyos nga lalaki nga makita ang iya pamilya nga 17 ka tuig na ini nga wala nakapauli sa ila.
Walo ka tuig pa lamang si Rey Orencio sang siya ang gindala sang iya magulang sa Bacolod City.
Apang, nagbulagay ang magulang sini kag ang iya bana kag si Rey ang nabilin nga naga-isahanon.
Siya ang ginbuligan ni Baby Cabugwas Goopio nga magpalapit sa Bombo Radyo Bacolod kag ginpadala sa Bombo Radyo Capiz ang panawagan kag amo na nga nakilala ang iya pamilya.
Kaina sang aga, nagkitaay na ang pamilya Orencio.
Sa interview sang Bombo kay Nelda, tuman ang iya kalipay nga makita ang ikapito sini nga bata sa madugay na nga tion nga wala ini sa iya nga tupad.
Suno diri, dal-on sini si Rey papuli sa ila balay agud nga makita man sini ang iya iban pa nga utod.
Halos indi naman makakas ang yuhum ni Rey nga liwat sini nga nakita ang iya iloy kag amay kag makapauli na sa ila nga balay.
Suno diri, nalipay ini nga makit-an na niya ang iya mga utod kag iban pa nga pamilya.
Dako naman ang pagpasalamat ni Baby Cabugwas Goopio kag pamilya Orencio sa Bombo Radyo Bacolod sa bulig nga makita ni Rey ang iya pamilya.
