Ginalantaw sang isa ka farmers association sa Negros Occidental nga duha ang mangin epekto sang pagtalana sang gobyerno sang price range sang nabulad nga humay nga P19 to P23 kag P16 to P19 sa wala pa nabulad.
Sa interview sang Bombo Radyo kay Myrna Perez Villa, chairman sang Newton-Camingawan-Para Farmers Association sa ciudad sang Bago, luyag sang kalabanan nga mga mangunguma nga ibaligya gilayon ang tubas nga humay pagkatapos sang ani agud nga wala na sang dugang nga gasto kag kabudlayan bangud sa ila lugar mismo ang baydanay.
Kun P19 to P23 kada kilo ang purchasing price sang gobyerno suno sa iya, P5 ang mabuhin sa buying rate ukon P18 kag may yara man sang criteria ang NFA kun pila ang moisture content.
Ginalantaw ni Villa nga bentaha sa mga mangunguma ang P16 to P19 nga purchasing price sang NFA sa wet palay kag P19 to P23 sa dry palay bangud indi na mahigot ukon madiktahan sang mga traders kag millers ang presyo kag indi na nila pagbaklon sang P16 ukon P15 ang humay.
Suno kay Villa, duha ka butang ang iya nakita nga epekto sang purchasing price nga gintalana sang NFA council kun sa diin indi na makadikta ang mga traders kag millers kag makakuha man ang NFA sang buffer stock sang humay nga igapanagtag sa iban nga ahensya sang gobyerno sa tion sang kalamidad kaangay sang Department of Social Welfare and Development.
Mas bentaha naman suno kay Villa kun magaconsolidate ang mga asosasyon ukon kooperatiba agud nga mabuligan ang magagmay nga mga mangunguma kag indi na magproblema kun sa diin makuha sang hauling trucks nga gamiton sa pagtransport sang humay padulong sa buying station sang NFA.
Bangud sini, ginaduso sang Newton-Camingawan-Para Farmers Association nga pabakuron pa gid sang gobyerno ang mga farmers associations kag cooperatives.
Sa daan nga guidelines suno kay Villa, ang individual farmer ang nagadala sang humay sa buying station sang NFA gani dako ang gasto.
