Suportado sang transport gorup sang traditional jeepney drivers kag operators ang pagsulod sa modernization program basta sila ang magatukod sang ila kaugalingon nga kooperatiba.
Sa interview sang Bombo Radyo kay Albert Villanueva, chairman sang Sentrong Samahan ng Tsuper at Operators Negros (SSTONE), kahapon kaupod ang Federation of Bacolod City Drivers Association (FEBACDA) nagpatigayon sang meeting ang transport group sa Bacolod angot sa deadline sang Provisionary Aithority sa pagbyahe sang traditional jeepney nga tubtob na lamang sa Disyembre 31, subong nga tuig.
Suno diri, wala sila sang problema nga magsulod sa modernization program apang wala ini nagasuporta sa sistema nga sila magsulod sa kooperatiba sang Land Transportation Franchising and Regulatory Board (LTFRB).
Sa ila nga meeting, ila nadesisyonan nga sila mismo magatukod sang ila kaugalingon nga kooperatiba sa bulig ni Bacolod City Mayor Alfredo Albee Benitez.
Pahayag ni Villanueva, nakig-angot na ini sa alkalde kag sila gintugyanan nga kumpletuhon ang tanan nila nga dokyumento, agud sa una nga semana sang Enero sila ang igaregister na sa idalum sang ciudad agud sila makapadayon sa pagbyahe.
Nagpasalig man ini sa mga traditional jeepney driver kag operators nga indi magkabalaka sa pahayag ni President Ferdinand Marcos Jr nga kun indi sila maconsolidate, sila ang maphase-out, nga suno kay Villanueva pagahimuon sini ang tanan agud makapadayon sa pagbyahe ang mga traditional jeepney nga ila palangabuhian.
