Naghalad sang bulak kag pangamuyo ang grupo sang Federation of Urban Poor (FED UP) para sa pila ka sector sang sosyodad kadungan sang selebrasyon sang Ninoy Aquino Day kahapon.
Sa interview sang Bombo Radyo Bacolod kay Joy Jarabelo, naghalad sila sang pagpangamuyo para sa men in uniforms, civil society organizations kasubong man para sa gobyerno ilabi na sa presidente kag cabinet members.
Suno kay Jarabelo ang ila nga selebrasyon ang padayon nga pagprotesta batok sa interment ni anay President Ferdinand “Bongbong” Marcos Jr.
Ini man ang pagdumdom nila sa 39th death anniversary sang baganihan nga si anay senator Ninoy Aquino nga naghatag sa ila sang kaisog sa pagpanindugan batok sa pagpamigos sa tion sang ginakabig nila nga dictatorial regime ni anay President Ferdinand Marcos Sr.
Ginpahayag man sini nga sa subong indi man mahapos ang pagpahayag sang ila panan-awan bangud ang sa karun nga administrasyon ang ginapamunuan man sang Marcos apang sa pihak sini padayon sang mga ini ginapahayag nga si Marcos Sr. ang indi baganihan kundi si Ninoy Aquino ang matuod nga baganihan.
Ginpahayag man sang mga ini nga indi tanan nga mga baganihan ang ginlubong sa libingan ng bayani, kag indi tanan nga nalubong diri ang mga bagani.
Suno kay Jarabelo, indi nila luyag ang fake news kag indi man nila luyag nga ligwaton kun ano man ang nakabutang na sa kasaysayan.
Nagalaom man ang mga ini nga sa bag-o nga administrasyon nga mahatagan na sang solusyon ang mga ginapangatubang nga krisis sang pungsod.
