Naghalad sang bulak kag pagpangamuyo ang grupo nga Federation of Urban Poor Negros Occidental sa monumento ni anay Senator Benigno “Ninoy” Aquino Jr. kadungan sang pagsaulog sang ika-37 ka anibersaryo sang EDSA People Power Revolution subong nga adlaw.
Sa interview sang Bombo Radyo kay Joy Jarabilo, provincial coordinator sang FED-UP, 122 ka mga miyembro nagikan sa Bacolod, Talisay kag Manapla ang naghalad sang bulak kag pagpangamuyo bilang paghanduraw sang EDSA People Power Revolution.
Ang tema sini nga tuig amu ang “Paghiliusa Para sa Kahilwayan, Malab-ot ang Kauswagan”.
Suno kay Jarabilo, sila ang nagapanawagan batok sa kabutigan sa social media nga puno sa karun sang fake news kag disinformation.
Nagapanawagan man ini sang kahilwayan sa gutom, unemployment, kamahal sang mga balaklon kag kahilwayan sa inequality.
Nagapasalamat man si Jarabilo kay President Ferdinand “Bongbong” Marcos Jr. sa pagdeklarar sang annibersaryo sang EDSA bilang holiday.
Suno sa iya, apisaar nga masakit sa ila nga bahin bangud sa amu sini nga adlaw ginpalayas ang mga ini sa Malacanang, iya gihapon ginkilala ang maragtason nga hitabo.
Ini ang nagapatimaan lamang nga iya ginarespeto ang maragtas sang pungsod.
Suno diri, 15 ka tuig na sila nga nagacommemorate sini kada Pebrero 25 kag Agosto 21.
122 sa karun ang ila headcount kag mas madutay sang sa 157 sang tinalikdan nga tuig.
Luyag sang FED-UP nga madumduman sang mga kabataan nga sa paghiliusa, sarang nga malampuwasan ang tanan kag indi kinahanglan nga ipaagi sa bayolente nga paagi.
