Nagtipon apisar nga naga-inulan ang mga miyembro sang Federation of Urban Poor – Negros (FedUP-Negros) sa paghanduraw sa ika- 40th nga People Power Revolution ukon EDSA Revolution subong nga adlaw.
Sa interview sang Bombo Radyo Bacolod kay Ma. Joy Jarabelo, provincial coordinator sang FedUP-Negros, kaina sang aga kapin 80 sila ka mga miyembro ang nagtambong sa prayer offering kag flower offering sa monumento ni the late Senator Benigno Simeon “Ninoy” Aquino Jr. sa dalan Araneta, Bacolod City.
Suno diri, naghalad sila sang bulak kag ribbon nga nagaduag sang yellow sa monumento ni Aquino.
Nagpatigayon man sila sang motorcade sa Araneta St, Lizares St, kag Lacson St apang nagdisperse man sila gilayon bangod may yara sila sang trabaho kag subong nga hapon nagtambong man sila sa A Trillion Peso March.
Suno kay Jarabelo, dako ag importansya sang paghanduraw sang EDSA revolution nga natabo sang 1986 kun sa diin milyon ka mga tawo ang nagtipon sa EDSA para mangisog nga mapapanaog sa pwesto si former President Ferdinand Emmanuel Edralin Marcos Sr.
Suno diri, bisan sa natabo nga rally sa EDSA, wala sang inaway nga natabo sa pagtililipon sang mga Pilipino.
Panawagan sini nga dapat mahuya ang gobyerno sa ginahimo nila nga pagpangawat sa mga ordinaryo nga Pilipino.
