97 ka mga kapulisan ang magabantay agud maseguro ang kahilwayan sa patigayunon nga Festival of Lights 2025 sang STI-West Negros University.
Sa interview sang Bombo Radyo Bacolod kay Bacolod City Police Office Spokesperson Police Captain Andro Maapni, apat ka floats ang magapa-indis indis.
Alas-3:00 subong nga hapon ang assembly time sa Upper East Megaworld, samtang pagdangat sa alas-5:00 sang hapon may patigayunon nga gamay nga programa kag may-ara sang ribbon cutting nga patigayunon.
Ginabanta sini nga alas-5:30 magasugod na ang parade padulong sa Bacolod City Government Center.
Kaupod man nila sa preparasyon ang Bacolod Transportation and Traffic Management Department, Public Order and Safety Office kag Engineering Department sang Bacolod City Government.
Samtang may kapin 600 man nga Reserved Officer Training Corps (ROTC) sang STI-West Negros University nga maga-upod sa pagbantay.
Pagdangat sa BCGC, may-ara sang stage kun sa diin sila ang magapatigayon sang programa.
Malauman man ang makadali nga pag-untat sang trapiko, apang pasalig ni Maapni nga ini ang magaresume man gilayon kun makalabay na ang parada.
