Nagtapos sa 0–0 ukon draw ang match sang 2010 world champion nga Spain kag debutant nga Cape Verde sa Group H sang FIFA World Cup 2026 nga ginhiwat sa Mercedes-Benz Stadium.
Apisar mas dominante ang Spain nga may kapin 21 shots on goal, wala sila gihapon nakalusot sa depensa sang 40-anyos nga goalkeeper sang Cape Verde nga si Vozinha.
Ginpagwa naman bilang substitute sa 70th minute ang Barcelona winger nga si Lamine Yamal, apang nagpabilin nga patas ang score tubtob magtakop ang hampang.
Sa karon yara sa world no. 3 ang rank sang Spain kag 2010 World Cup champion, samtang ini naman ang labing una nga kahigayunan para sa Cape Verde nga malakip sa World Cup kag kabahin sila sa mga low ranked nga team naggikan sa Africa.
Sa pihak nga bahin, sa Group G sa Seattle, nakuha sang Egypt ang 1–0 nga kadalag-an kontra Belgium.
Timprano nga naka-goal ang Egyptian midfielder nga si Emam Ashour sa una nga 20 minutos sang hampang.
Ang Belgium nga yara karon sa world no. 9, ang napaslawan sa ila nga opener, samtang padayon naman nga napamatud-an sang Egypt ang ila kabaskog sa torneo bilang pito ka beses nga kampeon sa Africa Cup of Nations.
