Nangin matawhay ang ika-pito nga adlaw sang filing sang Certificate of Candidacy para sa provincial posisyon sa probinsya sang Negros Occidental.
Kaina sang aga, nagfile si 5th District Board Member Rita Gatuslao para magpare-elect sa ikatatlo sini nga termino.
Samtang, nagfile man sang COC si Former Silay City Mayor Mark Golez para sa pagka-alkalde sa ciudad sang Silay kag kaupod sini si Councilor Ryan Gamboa nga nagfile para mangin bise-alkalde.
Madumduman nga kahapon, nagfile sang COC si anay Congressman Jules Ledesma para magbalik bilang district representative sang First District.
Samtang, nagfile man sanday Salvador Benedicto Mayor Marxlen dela Cruz kag Incumbent Board Member Araceli Somosa nga pareho magapapili para sa Sangguniang Panlalawigan.
Kasubong man nga nagfile si Victorias City Mayor Javier Miguel Benitez sa pagka-congressman sang Third District samtang si Vice-Governor Jeffrey Ferrer ang nagfile man bilang kongresista sang Fourth District.
Sa karun, sa anum ka District sa Negros Occidental, lima pa lamang diri ang may nakafile na nga aspirant apang sa Fifth District ang ginabantayan pa kun sin-o ang magafile sang COC.
Samtang, tatlo na ang nagfile sang Certificate of Candidacy agud nga magpadalagan bilang gobernador sa probinsya.
Madumduman nga una nagfile sang COC para sa posisyon sang Gobernador amo ang mangunguma nga si Ferdinand Etabag Diego alyas Bongbong Gorilla, 50 anyos kag residente sang Barangay Gatuslao, banwa sang Candoni, Negros Occidental.
Nagsunod diri si Negros Occidental Governor Eugenio Jose “Bong” Lacson nga nagpasa sang COC para sa ikatatlo nga termino sini bilang gobernador.
Kag ikatatlo amo si Architect Jonathan Paul Octaviano sang Partido Lakas ng Masa.
Samtang, sa pagkabise-gobernador naman si Board Member Jose Benito Alonso pa lamang ang nagfile para sa posisyon.
