Kadungan sang pagtakop sang Election period kahapon, natapos naman ang pagpatuman sang Election Banning, samtang deadline man sang pagpasa sang Statement of Contributions and Expenditures (SOCE) sang tanan nga nagpapili sa Barangay and Sangguniang Kabataan Elections 2023 daog man ukon pierde.
Sa interview sang Bombo Radyo Bacolod kay Negros Occidental Provincial Election Supervisor Atty Ian Lee Ananoria, tubtob gid lamang alas-5:00 kahapon sang hapon ang filing sang SOCE kag sila ang magapadala sang notices sa mga nagkandidato nga wala nagpasa sang dokumento.
Paathag ni Ananoria nga may nagakaigo nga multa para sa mga wala nagfile sang SOCE, apang aminado ini nga gamay lamang ang fine sang first offense.
Apang ang mga nakathird offense na sa indi pagpasa sang SOCE ang pasakaan na sang Commission on Elections (COMELEC) sang kaso administratibo.
Bangod natapos na ang Election period kahapon Nobyembre 29, natapos naman ang Election banning.
Samtang paathag ni Ananoria nga sa karun ang Comelec ang nagapreparar naman para sa 2025 Midterm Elections.
Dugang pa sini nga sa malapit nga panahon sila ang magapatigayon naman sang voter’s registration kag sa karun sila ang naga-inventory na sang mga forms kag equipment nga gamiton.
