Naghatag sang commitment si Filipina teen tennis sensation Alex Eala nga magarepresentar sang national colors sa 31st Southeast Asian Games nga igahost sang Vietnam humalin Mayo 12 tubtob 23.
Ginkumpirmar sang amay sini nga si Mike nga ang 16-anyos nga player ang magahiwat sang iya madugay na nga ginahulat nga SEA Games debut sa Hanoi, kun sa diin ang Pilipinas ang magapdala sang indi magnubo 656 ka mga atleta.
Suno diri, nakaperma na sang registration si Eala.
Ang Rafa Nadal Academy scholar ang yara sa karun sa No. 10 sa Junior Rankings kag nagsaka sa No. 571 sa Women’ s Tennis Association ladder matapos ang 16 ka round sa W25 Joue les Tour sa France.
Si Eala man ang pinakabata nga Filipino nga nagdaog sang Grand Slam title.
Sang 2020, siya kag ang Indonesian partner sini nga si Priska Nugroho ang nagdaog sa Austrialian Open girls doubles event kag ginsundan ini sang 2021 French Open title kaupod si Russian ace Oksana Selekhmeteva.
Tuig 2019 pa kuntani magadebut sa SEA Games si Eala apang bangud sa konflikto sa iya training kag competition schedules, wala ini natigayon.
