Dako ang kalipay sang Pilipino nga miyembro sang Republican Central Committee nga nagbunga ang ila pagtinguha nga mapadaog si US President-elect Donald Trump.
Sa interview sang Bombo Radyo Bacolod kay Raul Sabido, Bombo International News Correspondent sa Nevada, USA, sang 2016 kag 2020 elections nakuha sang Democrats ang boto sa ila Estado.
Gani dako ang kalipay sini nga nabalik na sa pula ukon sa Republicans subong nga 2024 ang estado sang Nevada.
Suno diri dako nga pasalamatan ang kapin 400 mil nga Asian-Americans partikular na ang mga Pilipino sa pagdaog ni Trump.
Ini bangod kabahin sa campaign strategy sang mga Pilipino ang volunteerism kun sa diin sila ang nagpatigayon sang door knocking ukon nagapamalay-balay kag phone banking ukon pagpangampanya paagi sa pagpadala sang mensahe sa mobile phones.
Sila ang naglunsyar man sang operation hakot kun sa diin kun indi makahulog sang balota ang iban sa mga Pilipino, ini ang ila ginakadtuan kag sila na ang nagahulog sang mail-in ballots.
Ang aktibidad ang ginreplicate man sa iban pa nga mga estado.
Paathag ni Sabido nga ang nagapanguna gid sa rasun sa ila pagsuporta kay Trump amo ang plataporma sini sa pagpabangon sang ekonomiya.
Kalakip sa solusyonan sini ang tuman ka taas nga pagsaka sa presyo sang gatong kag matigayon nga mangin self sufficient ang America sa patag sang enerhiya.
Kasubong man sa dako nga factor sa eleksyon ang seguridad sa border ukon ang pagsulod sang mga illegal migrants.
Suno kay Sabido, indi mahibal-an ang nagasulod sa pungsod, kag iban sa mga ini ang mahimo mga kriminal, nga ginasagod pa sang karun nga gobyerno.
Isa man sa ginalauman ang pagpanubo sa ginabayaran nga buwis kag pagdula sang taxes sa retirement pension kag overtime.
Ginalauman nila nga mabalik ni Trump ang golden era para sa Estados Unidos sa liwat nga pagpungko bilang ika-47 nga Presidente sang Estados Unidos sa Enero 2025.
