Ginban sang isa ka tuig nga paghampang sang Japan Boxing Commission (JBC) si anay three-division world champion Filipino boxer John Riel Casimero bangod sa sobra nga kabug-atun sa iya ulihi nga hampang.
Ginapahayag nga nagdangat sa isa ka kilo nga sobra sa weight limit ang 35 anyos nga boksingero sa iya nga super-bantamweight bout batok kay American boxer Saul Sanchez sa Yokohama, Japan sang Domingo.
Gin-knockout sini si Sanchez sa una pa lamang nga round sang hampang.
Makaduha ka beses nga ginpatumba sang Quadro Alas ang American boxer sa first round.
Ginpauntat naman sang referee ang hampang 20 segundos ang nabilin antes matapos ang round.
Si Casimero nga may record nga 34 wins, 4 losses, 1 draw kag may 23 ka knockout, ang naga-angkon sang titulo sa junior flyweight, flyweight kag bantamweight divisions.
Dako naman nga kapierdihan ang pagban kay Casimero bangod ang Japan ang isa ka major boxing market.
Kabahin ang Filipino slugger sa listahan sang mga ginadumilian nga boksingero nga ginpost sang Japan Boxing Commission sa ila website.
