Pareho nga knockout ang target sang Filipino champion nga sanday Melvin Jerusalem kag Mexican challenger nga si Luis Castillo sa ila pagatubangay agud agawan ang World Boxing Council (WBC) minimumweight crown.
Magaatubangay ang duha sa Domingo, Septyembre 22, sa Mandaluyong City College.
Wala sang kalutusan ang 27-anyos nga southpaw sa 21 nga hampang, may 13 ka knockouts kag isa ka draw kag ginalantaw man nga gamiton sini ang height kag reach advantage batok kay Jerusalem.
Gamiton naman ni Jerusalem ang iya natun-an sang una nga tion sini nga gintinguhaan nga depensahan ang iya World Boxing Organization (WBO) mini flyweight belt sang 2023 apang nalutos.
Dako man ang pagsalig sang pambato sang Pilipinas nga nabasa na sini ang hulag sang kasumpong bangud madugay sini nga gin-sulit-sulit ang iya mga hampang.
Ini ang una nga title defense sang Pinoy boxer sa kaugalingon nga pungsod, partikular para sa WBC belt, halin sang nadepensahan ni Manny Pacquiao ang iya WBC flyweight crown batok anay kay Gabriel Mira sang Mexico sa Araneta Coliseum sang 1999.
