Ginpatilaw ni Pinoy boxer Melvin Jerusalem sang una nga kalutusan si Mexican challenger Luis Angel Castillo agud nga mapabilin sini ang iya nga WBC minimumweight title belt sa hampang nga ginpatigayon sa ciudad sang Mandaluyong.
Nakuha sang 30 anyos nga boksidor nga tumandok sang Bukidnon ang unanimous decision sa score nga 118-109, 120-107 kag 120-107.
Sa una nga round ginpaulanan dayon ni Jerusalem ang kasumpong kag iya ini napatumba.
Ginpahayag sini nga iya ginpilit nga i-knock out ang Mexican boxer apang nangin mabakod ini.
Ang hampang ang isa sa indi malipatan ni Jerusalem bangud madinalag-on sini nga nadepensahan ang iya nga titulo sa mismo nga pungsod.
Una nga nauyatan ni Jerusalem ang WBO 105- pound title sang napatumba sini si Masataka Taniguchi sang Japan sang Enero tinalikdan nga tuig apang ini ang iya nabuy-an matapos sang apat ka bulan sa paghampang batok kay Oscar Collazo sang Puerto Rico.
May yara sang 21 wins, isa ka kapierde kag isa ka draw nga record si Castillo samtang si Jerusalem ang may yara naman sang 23 wins, tatlo ka loses kag may yara sang 12 knockouts.
