Maga-abanse na sa final round sang men’s pole vault competition sa 2024 Paris Olympics ang Filipino pole vaulter nga si Ej Obiena.
Kahapon sa qualification round, wala nakuha ni Obiena ang 5.6m height sa duha ka attempt apang nakuha sini ang iya momentum sang maclear ang 5.70m tubtob na sa 5.75m.
Siya ang nakaset na nga maga-compete sa Agosto 6, ala- 1:00 sang aga, oras sa Pilipinas para sa final round.
Ginpahayag sang presidente sang Samahang Weightlifting ng Pilipinas nga nagpahayag ang Filipino Pole Vaulter nga si Ej Obiena nga may yara ini sang ginabatyag sa iya nga lawas.
Sa interview sang Bombo Radyo Bacolod kay Monico Puentevella, nangin maayo ang performance ni Obiena sa Quarterfinals kahapon apang posible nga mangin mabudlay para sa iya ang competition sa Finals.
Suno diri, matapos ang hampang nagpahayag si Obiena nga may ginabatyag ini sa iya nga lawas nga ginakabalaka man sini bangod nga madugay na nila nga ginahulat ang paghampang sa Paris Olympics.
Balantayan naman ang hampang sini sa Finals sa Agosto 6 kun sa diin maka-atubang sini ang No.1 pole vaulter sa bug-os nga kalibutan nga si Armand Duplantis sang Sweden.
Sa mahibaluan si Obiena ang No.2 pole vaulter sa bug-os nga kalibutan.
Samtang, dako naman ang pagpasalamat ni Puentevella sa Bombo Radyo Philippines sa pagdala sang mga balita gikan sa luwas sang pungsod pasulod sa Pilipinas.
