Nagatinguha ang mga Filipino track and field athletes nga ma-lapawan ang ila naangkon nga medalya sang 2023 sa patigayunon nga 33rd Southeast Asian Games nga pagahiwaton sa Thailand.
Samtang nagapreparar naman ang mga Filipino boxers para sa hampang.
Suno kay Jasper Tanhueco, secretary-general sang Philippine Athletics Track and Field Association (PATAFA), sila ang magapadala sang 60 ka atleta sa Thailand sa masunod nga bulan upod kay two-time Olympian EJ Obiena.
Sa karun, ang mga atleta ang nagafocus sa ila training camp sa New Clark City para sa mas mabaskog nga preparasyon.
Target nila nga malabwan ang 22 ka medalya nga nakuha nila sa Cambodia sang 2023 SEA Games.
Plano naman sang sang Association of Boxing Alliances in the Philippines (ABAP) nga magpadala sang 11 ka boksidor sa Thailand, apang wala pa sang final list.
Suno kay Philippine Olympic Committee (POC) President Abraham “Bambol” Tolentino, handum sang komitiba nga mamentinar ukon mapasaka ang ranking sang Pilipinas sa medal standings, matapos ginpanubo sang host country ang pila ka mga event nga may daku nga posibilidad para sa mga Pilipino.
Nahibaluan nga sang 2023 SEA Games sa Cambodia, nagtapos ang Pilipinas sa ikalima nga puwesto nga may 58 ka gold medals, 85 ka silvers kag 117 ka bronze.
Ang Pilipinas magapadala sang 1,600 ka atleta para sa 33rd SEA Games nga pagahiwaton sa Disyembre 9 tubtob 20 sa Thailand kun sa diin isa naman ini ka oportunidad nga mapakita sang mga Pilipino ang ila kusog kag kaisog sa tunga sang Southeast Asia.
