Apisar sang height kag reach advantage sang nakasumpong nga Italian boxer, nagmadinaugon sa gihapon ang Filipina boxer nga si Nesthy Petecio sa semi-final round kahapon, kun sa diin ang masunod sini nga hampang ang para na sa bulawan nga medalya sa 2020 Tokyo Olympics.
Suno kay Bombo International Samuria Correspondent Josel Palma, matapos nga malutos ni Petecio si Irma Testa, naseguro na sini ang silver medal sa pahampang.
Ginpakigbahin man sini nga bangod sa malaba nga kamot sang Italian boxer, nagadistansya naman si Petecio sa una nga round gani masami sya nga nagakaigo kag nangin pabor kag Testa ang una nga round sang hampang.
Nagbuhat naman sang adjustment kag plano ang boksidor sang nagumpisa na ang 2nd round kun sa diin nagdikit na ini sa kontra kag nangin in and out ang estilo.
Bangod sini, indi man makaigo sa iya si Testa gani ginatukuran nalang sini ang ulo sang Filipina fighter kag ginatiklod.
Ginpakigbahin pa ni Palma nga permi nalang mabatian ang referree nga nagasinggitan sang “no pushing” bilang paandam sa Italian boxer.
Ang pagdikit ni Petecio kag paghakos sang kasumpong ang naghatag naman sang kahigayunan kay Petecio agud makabuya sang mga solido nga inumol sa kilid ni Testa.
Napadayun naman sini ang sahi sang hampang sa round 3 gani nakita na sang mga judges nga pabor kag Petecio ang hampang nga nagtuga sang split decision nga 4-1.
Suno kay Palma, kun magdaog sa masunod nga hampang, si Petecio na ang mangin pinakauna sa women’s boxing sa Pilipinas nga makaangkon ang bulawan nga medalya.
Sunod sini nga makasumpong para sa gold medal amo ang Japanes Boxer nga si Sena Irie.
Ginpakigbahin pa sini nga si Petecio ang rank no. 2 sa world rankings samtang si Irie naman ang rank no. 13.
Samtang nahibaluan nga ini man ang una nga kahigayunan nga nagsulod sa Olympics si Irie kag wala man ini sang iban nga ginapanguyatan nga titulo magluwas sa rank no 13 sa world ranking.
Nagapati naman ang mga Pinoy sa Japan kasubong man ang mga half-Japanase half-Filipino nga pag-abot sa boxing, kilala na ang mga Filipino.
Dugang pa nga bentaha ni Petecio amo ang experience sa boksing ilabi na nga 21 anyos palang ang makasumpong sini.
Dapat naman suno kay Palma nga magstick sa game plan si Petecio kag maghemo sang adjustment kun indi epektibo agud makuha sini ang ikaduha nga bulawan nga medalya sa 2020 Tokyo Olympics.
