Ginhatagan sang award ang isa ka Filipino worker sa South Korea matapos sini ginsalbar ang kaupod nga Koreano nga diutayan lang maipit sa isa ka rubber press machine.
Sa interview sang Bombo Radyo kay Monico Lopez Caranay, tumandok sang Barangay Taculing, Bacolod City, nagbaton ini sang award kag pagkilala gikan sa Philippine Embassy sa Seoul, South Korea sa nahimo sini nga pagsalbar sa Koreano nga si Jaebin Cho nga kaupod sini sa trabaho.
Mayo 30, 2023, nagatutok si Caranay sa iya trabaho sa apat ka machine sini nga gina-operate kasubong man si Cho.
Malinong nga nagatrabaho si Caranay sa una sini nga machine samtang yara man sa punta si Cho.
May ginbutong si Cho nga kahon nga puno sang items nga luyag sini nga hakwaton kun tani apang indi sini sarang.
Ginbutong sini ang kahon kag nadanlog, kag nag-igo ang ulo sini sa semento.
Naglingin ang iya ulo apang nakuha pa sini nga magtindog.
Pagtindog sini, dugang pa gid nga nag-igo ang iya ulo sa dako nga metal steel kag amo nga natumba sa liwat.
Nagtupa ini sa press machine apang sadto man nga nagwarning ini nga maga-operate na.
Suno kay Caranay, nakita sini nga may kamot sang tawo nga nagalabaw kag amo nga nagdali-dali ini patay sang makina.
Oktubre 8, 2023 sang ginhatagan ini sang award sang Philippine Embassy sa Seoul, South Korea kag pagkilala sang Korean Government.
Nagbaton man ini sang sulat gikan kay Cho bilang pagpasalamat sa pagsalbar sa iya kabuhi.
Pahayag ni Caranay, nalipay ini sa pagsalbar sa kabuhi sang isa ka tawo nga ini nagapakita sang pagka-alerto, pagka-isog kag pagkamabinuligon sang isa ka Pilipino ilabi na sang isa ka Ilonggo.
