Ginpatigayon na kaina sang aga ang final testing and sealing sang vote counting machines nga pagagamiton sa eleksyon sa Lunes diri sa ciudad sang Bacolod.
Alas-8:00 sang aga, ginbagting ang lingganay sang mga eskwelahan nga magaserbe nga polling centers nga nagapatimaan sang pagsugod sang final testing and sealing sang VCMs.
Suno kay Charity Romay, DepEd supervising official sang Andres Bonifacio Elementary School 1, nag-abot ang VCMs alas-7:00 kahapon sang aga kag gindirekta ini sa mga classroom nga pagagamiton bilang polling precincts.
Suno kay Romay, 14 ka makina ang gindeliver sa ABES 1 bangud 14 man ka clustered precincts ang nahamtang diri.
Masobra 8,000 ka botante nagikan sa anom ka mga barangay sa ciudad ang natalana nga magboto sa Lunes kag ginalauman suno kay Romay nga makaboto ang halos tanan.
Paagi sa final testing and sealing, masiguro sang mga miyembro sang Board of Election Inspectors nga nagafunction ang makina.
Sang nag-abot ang makina kahapon suno kay Romay, nakasulod pa ini sa box kag kaina sang aga lang ginbuksan.
Kun matapos ang FTS, igabalik ang VCMs sa box kag igabutang sa holding room nga bantayan sang kapulisan.
Ang FTS ang ginsaksihan sang mga poll watchers sang magtimbang nga partido nga nagapadalagan.
Kun nagamalfunction ang VCM suno sa DESO, may yara man sang technician nga gilayon nga magalantaw sini kag kun indi makaayo, ini ang pagaislan.
Duha ka adlaw antes ang eleksyon, nagpanawagan si Romay sa mga botante nga mangin wise sa pagboto kag nagpanugyan sa mga manunudlo nga padayunon ang serbisyo.
Samtang, nangin madinalag-on man ang final testing and sealing sang mga vote counting machines sa Luis Hervias National High School sa Barangay Mandalagan, ciudad sang Bacolod kaina sang aga.
Suno kay Herbert Tecson, OIC principal sang Luis Hervias National High School, 11 ka clustered precincts ang nahamtang sa eskwelahan kag 8, 630 voters ang ginalauman nga magaboto sa Lunes.
Suno kay Tecson, handa na ang mga classrooms nga gamiton bilang presinto kag may yara man sang gintalana nga isolation polling place kun sa diin magabotohon ang voter nga lapaw sa 37.5 degrees Celsius ang body temperature.
Kaina sang aga, natapos naman ang final testing and sealing sang 11 ka vote counting machines.
Santo sa ginpatigayon nga final testing and sealing, wala man sang problema sa mga VCMs kag maayo man ang ila battery.
Ang FTS ang gintambungan sang electoral board nga ginalakipan sang chairman, poll clerk kag third member.
Suno kay Tecson, wala nagsugod ang FTS antes nag-abot ang mga watchers sang mga kandidato.
May yara naman sang average nga tatlo ka watchers kada presinto.
Sang natapos ang final testing and sealing, ang mga VCMs ang igabutang sa isa ka secure nga classroom kun sa diin yara sa property custodian ang lyabe diri.
Ang VCMs ang kuhaon sa secure classroom sa Lunes sang kaagahon.
Wala nakabaton ang Commission on Elections (Comelec) Bacolod sang significant report nga may problema sa mga vote counting machines nga gamiton sa ciudad sa Lunes kadungan sang final testing and sealing kaina sang aga.
Suno kay Bacolod City Election Officer Atty. Revo Sorbito, mga miyembro sang electoral board ang nagpatigayon sang FTS kag indi ang Comelec.
Ang mga electoral boards ang nagsumiter man sang report sa Comelec office sang natapos na ang final testing and sealing.
Wala naman sang timeframe nga ginhatag sa mga manunudlo, ang importante nga matapos ang FTS.
Tinutuyo sang final testing and sealing suno kay Sorbito nga maremedyuhan kun may yara sang diperensya sa makina bangud may duha pa ka adlaw antes ang eleksyon.
Sa ulihi nga adlaw sang campaign period, nagpahanumdom si Sorbito nga ipatuman na alas-12:00 sang Domingo sang kaagahon ang liquor ban tubtub sa 12:00 midnight sang Mayo 9.
