Luwas nga isa ka music composer kag medical technologists, karun isa naman ka abogado ang finalist sa Ilonggo Music Festival 2016 sang Bombo Radyo Philippines nga si Atty. Glenn P. Salve.
Sa interview sang Bombo Radyo Bacolod kay Atty Salve, ikatatlo na sini nga take antes makapasar sa 2025 Bar Examination.
Siya sadto ang nagatudlo sa Medtech department sang University of Negros Occidental – Recolletos sang 2009, sang ginpatudlo sa iya ang medtech laws and ethics nga subject.
Bangod wala sang background, nagsulod ini sa School of Law agud may-ara sang background.
Plano kuntani niya nga tubtob lang sa 1st semester ang tapuson, apang ginpanugyan sang mga katrabaho nga padayunon nalang ang nasuguran.
Si Atty Salve ang nakagradwar sang 2013, kag gilayon man ini nga nagkuha sang bar exam, apang wala makapasar.
Sang 2022, siya ang liwat nga nagkuha sang bar exam apang wala gihapon makapasar.
Suno sa iya, bangod sa siya ang nagaserbe sadto nga Biosafety Officer sa Corazon Locsin Montelibano Memorial Regional Hospital, mas nangin focus sini ang mga kaso sang COVID-19 kag wala natutukan ang pagreview para sa Bar Exam.
Sa karun si Atty Salve ang nagatindog nga manager sang Blood Bank sa Regional Hospital.
Agud makapreparar sa pasinawan, nagfile ini sang 6-month leave, nga gilayon man nga ginpaboran sang mga opisyales sa ospital.
Gintry sini nga magreview center sang 2024, apang indi komportable gani mas ginpili sini nga magself-review sang magrant ang iya leave.
Suno kay Atty Salve, nga karun 54 anyos na, apisar nga nakagradwar sa School of Law, mabatyagan sini ang kakulangan sang wala pa nakapasar sa Bar exam.
Pahayag sini nga siya ang nagcompete sa iya kaugalingon kag gin-imprubar ang kun ano ini sadto.
Sa karun, wala pa ini sang plano kag gina-enjoy anay ang nabatyagan nga kalipay, samtang magabalik naman ini sa trabaho sa Blood Bank sa masunod nga semana.
Pahayag ni Atty Salve, nga nagaserbe sini nga passion ang pagcompose sang kanta.
Siya ang isa sa mga finalist sa Ilonggo Music Festival 2016 sa ambahanon sini nga “Lahat ng sandali ko’y ikaw.”
