Nagpasalig ang legal counsel sang JGM Finance Corporation nga sila ang nagapatigayon na sang internal investigation agud matumod kun ila gid man personnel ang nagloan sa Social Security System pension sang ila anay kliyente.
Ini ang nangin sabat ni Atty Joshua William Su, kasunod sang pagdangop ni Purita Paguntalan sa Ipa-Bombo Ta segment sang Bombo Radyo Bacolod.
Suno diri, luwas sa internal investigation sa mga personnel, partikular na sa mga naghikutar sang nagaprenda pa sa ila sang ATM si Paguntalan, ginatsekyar man nila ang CCTV kun may maretrieve nga importante nga datos.
Samtang gintun-an man sini ang online system, kalakip na ang sa SSS kag Union Bank nga gina-alegar ginpadal-an sang kwarta.
Suno diri, ginalantaw niya ang posibilidad nga mahimo man sang iban sa gwa na sang ila korporasyon ang pagscam.
Pahayag ni Su nga kilala niya ang naghimo sang software para sa Union Bank kag ginpasalig sini nga may ara sang “Know Your Customer” protocol ang bangko.
Kun sa diin sila ang nagarequire sang verification agud matumod nga lehitimo ang kliyente, kaangay sang facial recognition.
Kasubong man sa SSS portal kun sa diin ma-access lamang kun nahibaluan ang personal data sang SSS member.
Pasalig ni Su nga sila ang willing gid magbulig agud mahatagan sang kasanagan kag mapapanabat ang nagahimo sang pension loan scam.
