Dako na nga bulig para sa isa sa mga evacuee ang dala nga financial kag food aids sa pagbisita ni President Ferdinand “Bongbong” Marcos Jr. sa evacuation center sa La Carlota City.
Sa interview sang Bombo Radyo Bacolod kay Edniel Diego, sila ang halos tatlo ka bulan na nga nagatinir sa evacuation center.
Suno diri, maayo man ang sitwasyon nila sa evacuation center, apang mas makapahuway gid kun yara sa balay.
Aminado si Diego nga supisyente man ang ginahatag nga pagkaon sa mga evacuees kag sila ang wala man ginapabay-an.
Apang sa pihak sini, siya ang nagatrabaho gihapon bilang construction worker sa Talisay City kag nagabalik lamang kun Sabado.
Siya ang temprano naman nga nagpauli sa pag-abot ni Presidente Marcos, bangod pangalan sini ang nakalista sa distribusyon.
Dako nga bulig para sa ila pamilya ang P5,000 nga cash kag foodpacks nga ginalakipan sang lima ka kilo nga bugas kag mga canned goods.
Suno diri, ang kwarta ang itigana niya sa pagbalik sa ila nga balay, bangod kinahanglan na nga maislan ang ila nga atop.
Pahayag ni Diego nga madasig nga nagakatuktukan kag nagakaguba ang atop kun matup-an sang mainit nga asupre.
Ini ang nagsugata sa iya sang siya ang magbalik sang tinalikdan sa ila balay.
Paathag ni Diego nga mahimo lamang nga makapauli apang dapat lamang magkuha sang gate pass kag magbalik gilayon.
Sa tion nga indi makabalik sa oras, ang mga nagsulod sa 6km danger zone ang ipasuli na sa ila Barangay.
