Gintindugan ni forensic analyst Atty. Alex Cabrera nga maathag ang kakulangan sa financial records sang Cale88 sa pagsabat sini sa mga pamangkot ni Senator-Judge Raffy Tulfo sa ika-38 nga adlaw sang impeachment trial ni Vice President Sara Duterte.
Sa iya interjection, ginpamangkot ni Tulfo si Cabrera kun natsekyar sini ang accounts payable kag accounts receivable sang Cale88, kasubong man ang mga dokumento nga nagapamatuod sa aktwal nga pag-export sang mga produkto sini sa mga pungsod nga namensyonar sa hearing.
Ginklaro ni Cabrera nga madamo sang indi normal nga detalye sa financial statements sang kompanya, kalakip na ang kakulangan sang records sa payable, receivable, kag inventory sang raw materials ukon work in process, bisan ang manufacturer ukon exporter sang mga produkto.
Dugang pa sang testigo, nga makumparar nila ang financial statements sang Cale88 sa lima tubtob anom ka kompanya nga may kaangay nga negosyo, kag yara sa P200 million ang yearly revenue.
Suno diri, mas dako ang property, plant and equipment, inventory, receivables, kag payables sang mga kompanya nga gingamit sa pagkumparar sa Cale88.
Samtang, sang ginpamangkot ni Tulfo kun napamatud-an sang Bureau of Customs ang aktwal nga pag-export sang mga produkto sang kompanya, ginklaro naman ni Cabrera nga wala niya personal nga natsekyar ang nasambit nga mga records.
Gin-ako man sang testigo nga wala nila nakuha ang datos nga makapamatuod kun nagasanto ang kadamuon kag balor sang mga produkto nga gina-export sang kompanya sa kwarta nga nagasulod.
