Nagsaka sa 13 ang mga reported nga nalukpan sang firecrackers sa Bacolod City halin sa besperas tubtob sa mismo nga bag-ong tuig.
Sa interview sang Bombo Radyo Bacolod kay Bacolod City Police Office Spokersperson Police Capt. Ma. Liberty Indiape, sa 13 nga firecracker-related incidents, 12 diri ang lalaki kag isa ang babayi.
Tig-tatlo ang biktima sa Barangay Vista Alegre kag Singcang-Airport, tig-duha sa Barangay Estefania kag Villamonte samtang tig-isa naman sa Barangay Bata, Mandalagan kag Banago nga lunsay mga minor injuries lamang.
Suno kay Indiape, sila ang wala pa sang nabatun nga report gikan sa Bacolod City Health Office subong nga Enero 2.
Anom sa mga biktima ang yara sa edad nga 11 tubtob 19 anyos, apat ang sa 20 tubtob 39 anyos, duha sa 10 anyos panubo kag may isa ka biktima sa edad nga 40 tubtob 69 anyos.
Wala naman sang narecord nga stray bullet incident sa Bacolod City, kag ang may-ara lamang amo ang persona nga naiguan sang bala sa hita matapos maglupok ang armas-luthang nga yara sa bag.
